فوائد الدهون الصحية في وجبات الدايت
كشف الدكتور محمد طارق فؤاد Dr Mohammed Tarik Fouad خبير التغذية العلاجية "السمنة والنحافة"وخبير جلسات نحت القوام
 |
وتحدث قائلا هتلاقي ناس كتير بتقول
" كل حاجة مسلوقة ، الفراخ تاخد الصدر وتشيل الجلد ، اللحمة تشيل الدهون اللي عليها كلها ، تاكل بياض البيض الصفار لأ ، الجبنة خالية الدسم ، الزبادي خالي الدسم ، اللبن خالي الدسم .. "
"إياك يبقى ف أكلك أي دهون .. إيااااك أنا بحذرك "
وأوضح في كلامه أن كل هذا هراء غير صحيح
كتير من أنظمة الدايت المهلكة العجيبة بيطلبوا فيها قطع الدهون تماما ..
ودا خطأ فادح ، وضرر كبير جدًا ..
ولذلك لما أجي اقولك تاكل ايه عشان تخس ، تزيد ، او تحافظ على وزنك .. يستحيل ماجبش سيرة الدهون .. لازم اقولك ماتنساهاش ..
يعني معلقة زيت الزيتون على السلطة ف الفطار ، او على الفول ف السحور شيء أساسي ..
ومش في وقت أو فترة معينة بس
قبل م اكلمك عن أهمية الدهون هقولك معلومة ع الماشي كدا عن المنتجات خالية او منخفضة الدسم ..
الدهون أساسية عشان الأكل ياخد الطعم الحلو .. لما اشيل الدهون تماما ، يبقى الاكل بالظبط زي ورق الكارتون كدا لو جربت تاكله ،
ف عشان تشيل الدهون وتحافظ على طعم الأكل ، بتستبدلها بالسكر ..
يعني شال سعرات الدهون ، وزود مكانها سعرات سكر .. !!
ومش كدا بس دا السكر هيرفع الانسيولين اكتر بكتير ..!!
ف مفيش منه فايدة انك تدور وتدفع فلوسك ف الحاجة خالية الدسم صدقني ..
وأوضح الدكتور محمد طارق فؤاد
فوائد الدهون .
•حفاظ جسمك على الدهون وتخزينها من وجهة نظرك انه سوء حظ ، ولكن لأ دي طريقة الجسم للدفاع عن نفسه .. وتحصين وتأمين مستقبله ..
ف بيحول الدهون الزيادة ف الأكل لدهون تتخزن ، وكذلك يقدر يحول السكر والبروتينات الزيادة لدهون .. ودا ان دل على شيء ،ف هو قد ايه الدهون مهمة جدا لصحة جسمك ..
لان باختصار جسمك محتاج أحماض دهنية Fatty Acids لازم ياخدها من اكل الدهون لانه مايعرفش يصنعها من نفسه ..
•الدهون بتحسسك بالشبع بسرعة ، ف مابتكترش ف الأكل.
عشان كدا لما نقول أبدأ بطبق الشوربة وبعدها السلطة بملعقة زيت الزيتون والبروتين .. ابقى انا عايزك تشبع بيهم .. 💡
•بتفضل ف المعدة وقت أطول ف بتحس بالشبع والامتلاء لفترة أطول.
•بتعلي هرمون اللبتين ، اللي بيقولك انت شبعان وفلة ماتاكلش تاني بقى.
•من غيرها مفيش امتصاص ف الأمعاء للفيتامينات A , K , E , D ..
ومن غير الفيتامينات دي .. خد عندك مشاكل ف البشرة والشعر ، ف البصر ، ف جهاز المناعة ، ف العظام ، ف الجهاز العصبي ، ف كفاءة عمل الكبد ، وف ايقاف النزيف بتاع اي جرح .. 😕
•لما بتاكل البيضة كاملة بالصفار بتاعها ، ارتفاع الإنسيولين بيكون أقل من لما تاكل البياض لوحده ..
وكذلك اللحوم الصافية بدون دهونها بترفع الإنسيولين اكتر من اللحوم اللي فيها دهون ..
واحنا طبعا عارفين ان احنا مش عايزين نرفع الانسيولين جامد ، لانه مسؤول تخزين الدهون الأساسي .. فبالتالي وجود نسبة دهون حاجة ف مصلحتي .. ✌🏻
....
كلامي مش معناه انك تاخد ازازة زيت تشربها ..
لان الدهون أنواع ف لازم نعرف اي نوع الاحسن واخد قد ايه ..
ودا يسري على اي نظام غذائي حتى لو زي الكيتو high fat مش هتبلبع دهون عمال ع بطال وخلاص.
طيب ايه يا دكتور هعرف انا منين بقى !
ركز معايا كدا 👩🏻⚕️
الدهون أنواع .. دهون غير مشبعة .. دهون مشبعة .. دهون متحولة ..
*الدهون المتحولة هي الأسوأ ودي ف الشيبسي والبسكويتات والحلويات والزيوت المهدرجة وخلافه .. ف دي نتجنبها تماما ..
وان كانت مدسوسة ف كل حاجة ف يبقى 5 جرام منها يوميا كحد أقصى .. فلو مش هتعرف تحسبها يبقى تتجنبها .. ❌
*الدهون المشبعة زي ف منتجات الألبان اللبن والجبن والزبدة والقشطة والدهون الحيوانية والزيوت زي زيت جوز الهند .. مش أصح حاجة لكنها افضل بمراحل من المحولة ..
ف استهلاكك اليومي منها مش أكتر من 20 جرام .. ✅
*الدهون الغير مشبعة .. دي الأفضل على الإطلاق ..
منها الأحادية .. زي المكسرات واللب، زيت الزيتون الخام .. زيت السمسم .. زيت بذر الكتان ..
او متعددة.. زيت السمك ف الاسماك الدهنية زي السردين والسلمون والتونة والماكريل ..
غنية جدا بأوميجا ثري .. ✅✅
طيب عرفت اني هركز ع الدهون الغير مشبعة .. هاخد قد ايه منها؟ 🤷🏻♂️
لو انت ف نظام غذائي متوازن نسبة الدهون ف اكلك تبقى من 15-20 % من سعراتك اليومية ..
لو ف نظام مرتفع الدهون منخفض الكارب زي الكيتو .. نسبة الدهون بتوصل لـ 75% ..
إرسال تعليق