النحافة والكورتيزون
دكتوور...انا رفيعه وصاحبتي قالتلي فيه حقن حلوه اوي اسمها ديكساميثازون بتخن وتخلي وشك مدور وزي القمر😍😍😍
دكتور انا كنت باخد كورتيزون من فتره وجالي الم ف رجلي وروحت لدكتور عظام عاملي اشعه وقالي انتي محتاجه نغيرلك المفصل وانا بنت وداخله علي جواز اعمل ايه؟؟!😢😢😢😢
الموضوع ده مهم ليك كصيدلي بيجيلك يصرف الحقن من غير روشته
طبعا مكنتش ناوي اتكلم عن عيوب استخدام الكورتيزون لفترات طويله وبدون استشاره طبيب علشان ناس كتير اتكلمت فيه ولكن مازالت لالسف المصايب الي بتيجي بسبب استخدامه موجوده 😔😔😔😔 قبل ما اتكلم عن عيوبه هو ايه استخدماته اصلا.. .
صل ع النبي صل الله عليه وسلم😊😊😊
اولا.... بيستخدم كبديل في حاله فشل الغده الي بتطلعه لسبب ما زي ف مرض اسمه اديسون .
ثانيا.... بيستخدم كمضاد لالتهابات والحساسيه زي في حالات.. الميه ع المخ او زياده الضغط داخل المخ ..او في حالت الحمي الروماتيزميه او الانميا التكسيريه او في متلازمه ما بعد جلطات القلب او في حاله مرض تقرحات القولون او الكرونز
الناس بتوع الربو الشعبي او الي عنده تمدد شعبي او التهاب شعبي مزمن 😊😊
ف الامراض المناعيه زي الذئبه الحمراء او الروماتويد او في خشونه المفاصل كحقن موضعي احيانا 😊😊
ممكن نستعمله ف التهابات العين او الحساسه او ف الاكزيما او حساسيه الجلد
لما نزرع كلي او ايها نسيج بيتزرع علشان يقلل المناعه او في حالات الوكيميا او اليمفوما وهكذا ...
طيب يعم احنا عرفنا معظم استخدماته ايه بقي عيوبه ؟؟؟!اومال ليه بيتخن بقي ؟؟!
الكورتيزون بيتخن علشان كذا حاجه..
بيحرك الدهون من اماكن في الجسم ويرسبها في اماكن زي الوش والظهر والفخذ ف بيدي المنظر بتاع الوش المدور المحمر 😉😉😍 طب مهو ده المطلوب. اصبر بس متستعجلش...
وكمان بيقلل افراز الصوديوم ويخليه يتخزن جوه الدم علشان كده الصوديوم مش هيقعد لوحده لازم ياخد الميه معاه ويزود من حجم الدم وبيعمل ميه تحت الجلد زي ما هوه معروف😊 طبعا ف الوزن بيزيد والف مبروك😊 ..
تعالي بقي نشوف مشاكله ايه..
1/بيعمل سكر ليه😲😲؟
!لانه بيزود من تصنيعه ف الكبد وكمان بيحرك البروتين من العضلات ويوديه الكبد علشان يتحول لسكر وبالتالي العضلات هتبقي ضعيفه والشخص ده بيبقي مش قادر يتحرك .
2/بيعمل هشاشه في العظام وياريت نركز ف الحته دي وبيعمل مصيبه كبري جدا مشهور ف البنات وبتوصل لدرجه تغير مفصل عظم الحوض او الفخذ وهي تاكل في غضروف مفصل الفخذ او تسمي avasculare necrosis
ودي صعب جدا تتعالج حوالي 7-8حالات في الاسبوع تغير مفصل لبنات في سن الجامعات بسبب انها بتاخد كورتيزون علشان تتخن والكلام ده في مستشفات جامعه اسيوط بس ماعرفش بقي باقي الجمهوريه كام حاله... وده بسبب انه بيكسر البروتين وبنشط خلايا العظم المكسره .. 😢😢😢
3/طبعا بما انه بيخزن ميه وملح يبقي لازم يزود حجم الدم ويرفع الضغط وبيزود من تكوين الجلطات😢😢 وكمان ببقلل الكاسيوم لانه ليه تاثير معاكس لفيتامن D لانه بيمنع امتصاص الكاسيوم وده هيزود موضوع الهشاشه. 😡
4/ودي مهمه جدا انه بياخر من التئام الجروح لانه بيكسر من خلايا الفيبروبلاست والنسيج الضام الي بيدخل في التئام الجروح . 😢
تعبتوا ؟؟! لسه مكملين يومك طويل😂
5/بعمل قرحه في المعده ليه بقي علشان بيزود الحمض HCL وبيقلل من افراز المخاط الي بيبطن المعده وبحيمها من تاثير الحمض 😊 مبروك😢
6/ بيعمل ميه بيضه ع العين وميه زرقاء الاتنين مع بعض تخيل 😯
7/ بيزود من حدوث عدوي الصدر خصوصا بمرض الدرن او السل لانه بيقلل من المناعه 😊
8/لو واحده حامل واخدته بيعملها تشوهات في الجنين وكمان بيلخبط الدوره وبيخلي شعر يظهر في اماكن غير طبيعتها ف الستات يعني تربي شنب ودقن 😲😲😲😲
9/بيعمل ارق وعصبيه او اضطربات نفسيه وبيخل الشخص ده عنده مشاكل كتير ودايما عنده ملل ومتزمت وقرفان من نفسه😢
10/ طبعا دي اهم واحده فيهم لو حصل ان حضرتك وقفت الكورتيزون الي كنت بتاخده لفترات طويله مره واحده هيحصلك حاجه اسمها adrenal crisis او فشل ف افراز الغده للهرمون لان حضرتك عودت الجسم ع الكورتيزون الخارجي.. علشان كده لازم يكون فيه جدول لانسحاب الكورتيزون من الجسم علشان ما تحصلش اعراض الانسحاب.
إرسال تعليق